mir kya chiz hai sauda kya hai

'mīr' kyā chiiz hai 'saudā' kyā hai

mujh ko in logoñ kī parvā kyā hai

ye agar arse meñ aa.e ziiñ pesh

dekh tū merā bhī shohra kyā hai

ai sabā sham-e-sahar ko na satā

ab bujhī jaa.e hai arsa kyā hai

gar kiyā qatl kisī ko to kyā

chalo is baat kā charchā kyā hai

ek din us ke maiñ dar tak jo gayā

ye samajh dekhūñ to hotā kyā hai

the ka.ī shaḳhs baham harf-zanāñ

maiñ kahā un se ye ġhauġhā kyā hai

sun ke vaañ se jo nikal aayā ek

vo mujhe dekh ke kahtā kyā hai

aap jo der se is jā haiñ khaḌe

ye kaheñ aap ne bechā kyā hai

mil ga.e ḳhaak meñ ham ab to kah

'mus.hafī' terī tamannā kyā hai

'mir' kya chiz hai 'sauda' kya hai

mujh ko in logon ki parwa kya hai

ye agar arse mein aae zin pesh

dekh tu mera bhi shohra kya hai

ai saba sham-e-sahar ko na sata

ab bujhi jae hai arsa kya hai

gar kiya qatl kisi ko to kya

chalo is baat ka charcha kya hai

ek din us ke main dar tak jo gaya

ye samajh dekhun to hota kya hai

the kai shaKHs baham harf-zanan

main kaha un se ye ghaugha kya hai

sun ke wan se jo nikal aaya ek

wo mujhe dekh ke kahta kya hai

aap jo der se is ja hain khaDe

ye kahen aap ne becha kya hai

mil gae KHak mein hum ab to kah

'mushafi' teri tamanna kya hai