miras-e-be-baha bhi bachai na ja saki

mīrās-e-be-bahā bhī bachā.ī na jā sakī

ik zillat-e-vafā thī uThā.ī na jā sakī

vādoñ kī raat aisī ghanī thī siyāh thī

qindīl-e-e'tibār bujhā.ī na jā sakī

chāhā thā tum pe vāreñge lafzoñ kī kā.enāt

ye daulat-e-suḳhan bhī kamā.ī na jā sakī

vo sahar thā ki rañg bhī be-rañg the tamām

tasvīr-e-yār ham se banā.ī na jā sakī

ham madrasān-e-ishq ke vo honhār tifl

ham se kitāb-e-aql uThā.ī na jā sakī

vo thartharī thī jān-e-suḳhan tere rū-ba-rū

tujh par kahī ġhazal bhī sunā.ī na jā sakī

miras-e-be-baha bhi bachai na ja saki

ek zillat-e-wafa thi uThai na ja saki

wadon ki raat aisi ghani thi siyah thi

qindil-e-e'tibar bujhai na ja saki

chaha tha tum pe warenge lafzon ki kaenat

ye daulat-e-suKHan bhi kamai na ja saki

wo sahar tha ki rang bhi be-rang the tamam

taswir-e-yar hum se banai na ja saki

hum madrasan-e-ishq ke wo honhaar tifl

hum se kitab-e-aql uThai na ja saki

wo tharthari thi jaan-e-suKHan tere ru-ba-ru

tujh par kahi ghazal bhi sunai na ja saki