miThi dhun mein ga ke hamein bulata hai is mandir mein

mīThī dhun meñ gā ke hameñ bulātā hai is mandir meñ

kaun bhagat ye sub.h-savere aatā hai is mandir meñ

pyāsī devī maañg rahī hai rakt kā pyālā bhagtoñ se

dekheñ ab ke kaun sūrmā jaatā hai is mandir meñ

ūñche aasan baiThne vaalā ūñchī padvī paatā hai

gire huoñ ko pagle kaun uThātā hai is mandir meñ

yahāñ to sab bahre baste haiñ devtā hoñ yā bhagat mahant

kis ko apne dil kā dard sunātā hai is mandir meñ

patthar ne kab kis ko dī hai man-chāhī bhikshā batlā

kis ke aage haath apne phailātā hai is mandir meñ

kaun yahāñ aatā hai varna sub.h ko uTh kar jaldī meñ

hameñ to bas ik but kā ruup lubhātā hai is mandir meñ

kaun sunegā tere dukh ko harī harī ke kirtan meñ

kah kar kyoñ tū apnī baat gañvātā hai is mandir meñ

yahī samajhtā hai ki ab bhagvān usī ke bas meñ haiñ

jo bhī māthe tilak lagā kar aatā hai is mandir meñ

vo jo khoyā sā rahtā hai naam hai jis kā 'pāshī' jī

kyā vo ab bhī shām-savere aatā hai is mandir meñ

miThi dhun mein ga ke hamein bulata hai is mandir mein

kaun bhagat ye subh-sawere aata hai is mandir mein

pyasi dewi mang rahi hai rakt ka pyala bhagton se

dekhen ab ke kaun surma jata hai is mandir mein

unche aasan baiThne wala unchi padwi pata hai

gire huon ko pagle kaun uThata hai is mandir mein

yahan to sab bahre baste hain dewta hon ya bhagat mahant

kis ko apne dil ka dard sunata hai is mandir mein

patthar ne kab kis ko di hai man-chahi bhiksha batla

kis ke aage hath apne phailata hai is mandir mein

kaun yahan aata hai warna subh ko uTh kar jaldi mein

hamein to bas ek but ka rup lubhata hai is mandir mein

kaun sunega tere dukh ko hari hari ke kirtan mein

kah kar kyon tu apni baat ganwata hai is mandir mein

yahi samajhta hai ki ab bhagwan usi ke bas mein hain

jo bhi mathe tilak laga kar aata hai is mandir mein

wo jo khoya sa rahta hai nam hai jis ka 'pashi' ji

kya wo ab bhi sham-sawere aata hai is mandir mein