mil baiThne ye de hai falak ek dam kahan

mil baiThne ye de hai falak ek dam kahāñ

kyā jaane tum kahāñ ho koī dam ko ham kahāñ

kūche se tere uTh ke bhalā jaa.eñ ham kahāñ

juz naqsh-e-pā hai rahbar-e-mulk-e-adam kahāñ

dāman-kashāñ phire hai mirī ḳhaak se hanūz

rakhtā hai aah vo sar-e-marqad qadam kahāñ

us ke saf-e-mizha se laḌāve nishān-e-āh

ai fauj-e-ashk jaa.e hai le kar alam kahāñ

merā hī laḳht-e-dil hai ki ham-rāh-e-ashk hai

varna rahe hai aab se ātish baham kahāñ

sab se judā tire ḳhat-e-raihāñ kī shaan hai

us ḳhat ko likh sake hai zamurrad raqam kahāñ

muñh dekhūñ jo kare yad-e-qudrat se ham-sarī

aisī safā.ī haath kī aur ye qalam kahāñ

kyūñ-kar na saqf-e-charḳh-e-kuhan tham rahe 'nasīr'

mere sutūn-e-āh chhuT is meñ hai tham kahāñ

mil baiThne ye de hai falak ek dam kahan

kya jaane tum kahan ho koi dam ko hum kahan

kuche se tere uTh ke bhala jaen hum kahan

juz naqsh-e-pa hai rahbar-e-mulk-e-adam kahan

daman-kashan phire hai meri KHak se hanuz

rakhta hai aah wo sar-e-marqad qadam kahan

us ke saf-e-mizha se laDawe nishan-e-ah

ai fauj-e-ashk jae hai le kar alam kahan

mera hi laKHt-e-dil hai ki ham-rah-e-ashk hai

warna rahe hai aab se aatish baham kahan

sab se juda tere KHat-e-raihan ki shan hai

us KHat ko likh sake hai zamurrad raqam kahan

munh dekhun jo kare yad-e-qudrat se ham-sari

aisi safai hath ki aur ye qalam kahan

kyun-kar na saqf-e-charKH-e-kuhan tham rahe 'nasir'

mere sutun-e-ah chhuT is mein hai tham kahan