mil chuka mahfil mein ab lutf-e-shakebai mujhe

mil chukā mahfil meñ ab lutf-e-shakebā.ī mujhe

khīñchtī hai apnī jānib terī añgḌā.ī mujhe

ba.ad marne ke jo hāsil hogī rusvā.ī mujhe

zindagī kyā soch kar duniyā meñ tū laa.ī mujhe

ishq meñ yuuñ husn kī sūrat nazar aa.ī mujhe

vo tamāsha ban ga.e kah kar tamāshā.ī mujhe

ḳhud pukār uThtā junūñ takmīl-e-vahshat ho ga.ī

vo samajh lete jo dil meñ apnā saudā.ī mujhe

ho gayā kohrām barpā ḳhāna-e-sayyād meñ

baiThe baiThe āshiyāñ kī yaad jab aa.ī mujhe

kal thā maiñ ka.abe meñ maujūd aaj but-ḳhāne meñ huuñ

chain detā hī nahīñ shauq jabīñ-sā.ī mujhe

aa.ina bhī thā koī kyā zindagī kā aa.ina

dekhne par maut kī sūrat nazar aa.ī mujhe

zindagī kī kashmakash se dast-kash honā paḌā

naza.a meñ yaad aa ga.ī jab un kī añgḌā.ī mujhe

khul ga.ī chashm-e-basīrat ḳhaak meñ milne ke ba.ad

dil ke har zarre meñ ik duniyā nazar aa.ī mujhe

hazrat-e-'bismil' ye achchhī dil ko sūjhī dil-lagī

kar diyā shamshīr-e-qātil kā tamannā.ī mujhe

mil chuka mahfil mein ab lutf-e-shakebai mujhe

khinchti hai apni jaanib teri angDai mujhe

baad marne ke jo hasil hogi ruswai mujhe

zindagi kya soch kar duniya mein tu lai mujhe

ishq mein yun husn ki surat nazar aai mujhe

wo tamasha ban gae kah kar tamashai mujhe

KHud pukar uThta junun takmil-e-wahshat ho gai

wo samajh lete jo dil mein apna saudai mujhe

ho gaya kohram barpa KHana-e-sayyaad mein

baiThe baiThe aashiyan ki yaad jab aai mujhe

kal tha main kabe mein maujud aaj but-KHane mein hun

chain deta hi nahin shauq jabin-sai mujhe

aaina bhi tha koi kya zindagi ka aaina

dekhne par maut ki surat nazar aai mujhe

zindagi ki kashmakash se dast-kash hona paDa

naza mein yaad aa gai jab un ki angDai mujhe

khul gai chashm-e-basirat KHak mein milne ke baad

dil ke har zarre mein ek duniya nazar aai mujhe

hazrat-e-'bismil' ye achchhi dil ko sujhi dil-lagi

kar diya shamshir-e-qatil ka tamannai mujhe