mil gaya dil nikal gaya matlab

mil gayā dil nikal gayā matlab

aap ko ab kisī se kyā matlab

husn kā ro'b zabt kī garmī

dil meñ ghuT ghuT ke rah gayā matlab

na sahī ishq dukh sahī nāseh

tujh ko kyā kaam tujh ko kyā matlab

muzhda ai dil ki nīm-jāñ huuñ maiñ

ab to puurā huā tirā matlab

apne matlab ke āshnā ho tum

sach hai tum ko kisī se kyā matlab

ātish-e-shauq aur bhaḌkī hai

muñh chhupāne kā khul gayā matlab

kuchh hai matlab to dil se matlab hai

matlab-e-dil se un ko kyā matlab

un kī bāteñ haiñ kitnī pahlū-dār

sab samajh leñ judā judā matlab

us ko ghar se nikāl kar ḳhush ho

kyā 'hasan' thā raqīb kā matlab

mil gaya dil nikal gaya matlab

aap ko ab kisi se kya matlab

husn ka ro'b zabt ki garmi

dil mein ghuT ghuT ke rah gaya matlab

na sahi ishq dukh sahi naseh

tujh ko kya kaam tujh ko kya matlab

muzhda ai dil ki nim-jaan hun main

ab to pura hua tera matlab

apne matlab ke aashna ho tum

sach hai tum ko kisi se kya matlab

aatish-e-shauq aur bhaDki hai

munh chhupane ka khul gaya matlab

kuchh hai matlab to dil se matlab hai

matlab-e-dil se un ko kya matlab

un ki baaten hain kitni pahlu-dar

sab samajh len juda juda matlab

us ko ghar se nikal kar KHush ho

kya 'hasan' tha raqib ka matlab