مل کر ہر ایک شخص سے دل اتنا بھر گیا

مل کر ہر ایک شخص سے دل اتنا بھر گیا

اب اپنا ہی وجود نظر سے اتر گیا

کیا جانے کیوں یہ ہوتا ہے محسوس ان دنوں

میں جی رہا ہوں مجھ میں کوئی تھا جو مر گیا

پہلا سا وہ خروش سمندر میں اب کہاں

سیلاب ختم ہو گیا طوفاں گزر گیا

موسم نے جب بھی چپکے سے کچھ گل کھلائے ہیں

الزام شوخ تیز ہواؤں کے سر گیا

پانی کی طرح بہہ گئیں صدیاں کبھی کبھی

اکثر ہوا ہے یوں بھی کہ لمحہ ٹھہر گیا

مدت کے بعد آئینہ کل سامنے پڑا

دیکھی جو اپنی شکل تو چہرہ اتر گیا