mil kar har ek shaKHs se dil itna bhar gaya

mil kar har ek shaḳhs se dil itnā bhar gayā

ab apnā hī vajūd nazar se utar gayā

kyā jaane kyoñ ye hotā hai mahsūs in dinoñ

maiñ jī rahā huuñ mujh meñ koī thā jo mar gayā

pahlā sā vo ḳharosh samundar meñ ab kahāñ

sailāb ḳhatm ho gayā tūfāñ guzar gayā

mausam ne jab bhī chupke se kuchh gul khilā.e haiñ

ilzām shoḳh tez havāoñ ke sar gayā

paanī kī tarah bah ga.iiñ sadiyāñ kabhī kabhī

aksar huā hai yuuñ bhī ki lamha Thahar gayā

muddat ke baa'd ā.īna kal sāmne paḌā

dekhī jo apnī shakl to chehra utar gayā

mil kar har ek shaKHs se dil itna bhar gaya

ab apna hi wajud nazar se utar gaya

kya jaane kyon ye hota hai mahsus in dinon

main ji raha hun mujh mein koi tha jo mar gaya

pahla sa wo KHarosh samundar mein ab kahan

sailab KHatm ho gaya tufan guzar gaya

mausam ne jab bhi chupke se kuchh gul khilae hain

ilzam shoKH tez hawaon ke sar gaya

pani ki tarah bah gain sadiyan kabhi kabhi

aksar hua hai yun bhi ki lamha Thahar gaya

muddat ke ba'd aaina kal samne paDa

dekhi jo apni shakl to chehra utar gaya