mila bhi ye to use phir KHuda nahin milta

milā bhī ye to use phir ḳhudā nahīñ miltā

nahīñ nahīñ dil-e-be-mudda.ā nahīñ miltā

vo kah rahe haiñ ki un ko ḳhudā nahīñ miltā

koī hamāre sivā dūsrā nahīñ miltā

miTe huoñ kā ilāhī patā nahīñ miltā

rah-e-adam meñ kahīñ naqsh-e-pā nahīñ miltā

hinā se ḳhuun kisī ġhair kā milā hogā

hamāre ḳhuun se rañg-e-hinā nahīñ miltā

zamīn par kabhī un ke qadam nahīñ paḌte

ki sajda karne ko bhī naqsh-e-pā nahīñ miltā

nikal ke dekhte kyā hai havā zamāne kī

dar-e-qafas kabhī ham ko khulā nahīñ miltā

lahad se uTh ke kahāñ jā.iye qayāmat hai

vo bhiiḌ hai ki kahīñ rāsta nahīñ miltā

achhūte jaam haiñ mannat ke kuchh alag rakkhe

kise pilā.eñ koī pārsā nahīñ miltā

ye aas laa.ī hai saaqī ke āstāne par

dar-e-karīm se saa.il ko kyā nahīñ miltā

burī tarah lab-e-shīrīñ kisī ne chūse haiñ

ki gāliyoñ meñ tirī ab mazā nahīñ miltā

bajā ke dekhe haiñ nāqūs ham ne vaqt-e-azāñ

'riyāz' aap kā un se galā nahīñ miltā

mila bhi ye to use phir KHuda nahin milta

nahin nahin dil-e-be-muddaa nahin milta

wo kah rahe hain ki un ko KHuda nahin milta

koi hamare siwa dusra nahin milta

miTe huon ka ilahi pata nahin milta

rah-e-adam mein kahin naqsh-e-pa nahin milta

hina se KHun kisi ghair ka mila hoga

hamare KHun se rang-e-hina nahin milta

zamin par kabhi un ke qadam nahin paDte

ki sajda karne ko bhi naqsh-e-pa nahin milta

nikal ke dekhte kya hai hawa zamane ki

dar-e-qafas kabhi hum ko khula nahin milta

lahad se uTh ke kahan jaiye qayamat hai

wo bhiD hai ki kahin rasta nahin milta

achhute jam hain mannat ke kuchh alag rakkhe

kise pilaen koi parsa nahin milta

ye aas lai hai saqi ke aastane par

dar-e-karim se sail ko kya nahin milta

buri tarah lab-e-shirin kisi ne chuse hain

ki galiyon mein teri ab maza nahin milta

baja ke dekhe hain naqus hum ne waqt-e-azan

'riyaz' aap ka un se gala nahin milta