mila diye KHak mein KHuda ne palak ke lagte hi shah lakhon

milā diye ḳhaak meñ ḳhudā ne palak ke lagte hī shaah lākhoñ

jinhoñ ke adnā ġhulām rakhte the apne chākar sipāh lākhoñ

namāz o roze zakāt o haj par nahīñ hai mauqūf kuchh ai zāhid

jidhar ko jaave udhar ko haiñge ḳhudā ke milne ke raah lākhoñ

sunā hai maiñ ne ki tū ne merā kiyā hai shikva kisī se zālim

tire sitam aur mirī vafā ke jahāñ meñ haiñge gavāh lākhoñ

ajab tamāshā hai kis se kahiye asar nahīñ sañg-dil ke dil meñ

karūñ huuñ yaaro maiñ ek dam meñ hazāroñ naale va aah lākhoñ

kare hai fariyād ek aalam galī meñ us kī hai shor-e-mahshar

jo ek ho.e to kiije insāf us ke haiñ dād-ḳhvāh lākhoñ

karoḌ baarī meñ sau tarah se kahā ki khā aur khilā na maanā

koī to levegā chhīn tujh se tū joḌ ḳhissat-panāh lākhoñ

ye misra-e-soz sun ke 'hātim' kahe hai nāseh se ai azīzo

umīd-e-baḳhshish hai jab se ham ko kiye haiñ ham ne gunāh lākhoñ

mila diye KHak mein KHuda ne palak ke lagte hi shah lakhon

jinhon ke adna ghulam rakhte the apne chaakar sipah lakhon

namaz o roze zakat o haj par nahin hai mauquf kuchh ai zahid

jidhar ko jawe udhar ko hainge KHuda ke milne ke rah lakhon

suna hai main ne ki tu ne mera kiya hai shikwa kisi se zalim

tere sitam aur meri wafa ke jahan mein hainge gawah lakhon

ajab tamasha hai kis se kahiye asar nahin sang-dil ke dil mein

karun hun yaro main ek dam mein hazaron nale wa aah lakhon

kare hai fariyaad ek aalam gali mein us ki hai shor-e-mahshar

jo ek hoe to kije insaf us ke hain dad-KHwah lakhon

karoD bari mein sau tarah se kaha ki kha aur khila na mana

koi to lewega chhin tujh se tu joD KHissat-panah lakhon

ye misra-e-soz sun ke 'hatim' kahe hai naseh se ai azizo

umid-e-baKHshish hai jab se hum ko kiye hain hum ne gunah lakhon