mila ek guna sukun hamein jo tumhaare hijr mein ro liye

milā ek guuna sukūñ hameñ jo tumhāre hijr meñ ro liye

zarā bār-e-qalb subuk huā ka.ī daaġh dard ke dho liye

ho nashāt-e-dil ki malāl-e-dil hameñ pesh karnā jamāl-e-dil

kabhī hañs ke phuul khilā liye kabhī roke motī piro liye

hai rahīn ġham mirī justujū ye hai kaisā gulshan-e-rañg-o-bū

yahāñ kuchh gulo kī talāsh meñ ka.ī ḳhaar maiñ ne chubho liye

ka.ī umr dauḌte-bhāgte rahe yuuñ to shab ko bhī jāgte

kabhī thak ga.e to Thahar ga.e kabhī niiñd aa.ī to so liye

sabhī log mast-e-shu.ūr haiñ ki ḳhudī ke nashshe meñ chuur haiñ

koī ġham-shanās nahīñ yahāñ ġham-e-dil kisī pe na kholiye

ye unhīñ kā nuur hai jis meñ ham chale hausle se qadam qadam

jo sarishk ġham ke bahā liye jo diye vafā ke sañjo liye

mila ek guna sukun hamein jo tumhaare hijr mein ro liye

zara bar-e-qalb subuk hua kai dagh dard ke dho liye

ho nashat-e-dil ki malal-e-dil hamein pesh karna jamal-e-dil

kabhi hans ke phul khila liye kabhi roke moti piro liye

hai rahin gham meri justuju ye hai kaisa gulshan-e-rang-o-bu

yahan kuchh gulo ki talash mein kai KHar main ne chubho liye

kai umr dauDte-bhagte rahe yun to shab ko bhi jagte

kabhi thak gae to Thahar gae kabhi nind aai to so liye

sabhi log mast-e-shuur hain ki KHudi ke nashshe mein chur hain

koi gham-shanas nahin yahan gham-e-dil kisi pe na kholiye

ye unhin ka nur hai jis mein hum chale hausle se qadam qadam

jo sarishk gham ke baha liye jo diye wafa ke sanjo liye