mila hai jabr mein bhi utna iKHtiyar mujhe

milā hai jabr meñ bhī utnā iḳhtiyār mujhe

jo be-qarār huā aa gayā qarār mujhe

na fasl-e-gul kī ḳhatā hai na bādaloñ kā qusūr

tirī nazar ne banāyā hai bāda-ḳhvār mujhe

basā hai ruuh ke pardoñ meñ aaj tak vo surūr

pukār phir usī andāz se pukār mujhe

maiñ phir qafas meñ huuñ phir aa.ī hai chaman meñ bahār

phir ab ke yaad karegī mujhe bahār mujhe

uThā rahā huuñ sar-e-tūr ḳhaak ke zarre

mile haiñ ye tire jalve ke parda-dār mujhe

ḳhatā muaaf agar ho to ek baat kahūñ

tire karam ne banāyā gunāhgār mujhe

kisī kī ḳhaak pe sajde kiye jo maiñ ne 'sa.īd'

atā huā hai do-ālam pe iftiḳhār mujhe

mila hai jabr mein bhi utna iKHtiyar mujhe

jo be-qarar hua aa gaya qarar mujhe

na fasl-e-gul ki KHata hai na baadalon ka qusur

teri nazar ne banaya hai baada-KHwar mujhe

basa hai ruh ke pardon mein aaj tak wo surur

pukar phir usi andaz se pukar mujhe

main phir qafas mein hun phir aai hai chaman mein bahaar

phir ab ke yaad karegi mujhe bahaar mujhe

uTha raha hun sar-e-tur KHak ke zarre

mile hain ye tere jalwe ke parda-dar mujhe

KHata muaf agar ho to ek baat kahun

tere karam ne banaya gunahgar mujhe

kisi ki KHak pe sajde kiye jo main ne 'said'

ata hua hai do-alam pe iftiKHar mujhe