mila na khet se usko bhi aab-o-dana kya

milā na khet se us ko bhī āb-o-dāna kyā

kisān shahr ko phir ik huā ravāna kyā

kahāñ se laa.e ho palkoñ pe tum guhar itne

tumhāre haath lagā hai koī ḳhazāna kyā

fazā kā habs kisī taur ab nahīñ jaatā

ki talḳh dhuup kyā mausam koī suhānā kyā

tamām tarah ke samjhaute karne paḌte haiñ

miyāñ mazāq grihastī ko hai chalānā kyā

gunāh kuchh to mujhe be-tarah lubhāte haiñ

ye raaz khol hī detā huuñ ab chhupānā kyā

ho dushmanī bhī kisī se to dā.imī kyuuñ ho

jo TuuT jaa.e zarā meñ vo dostāna kyā

ḳhabar-naves nahīñ huuñ maiñ ek shā.er huuñ

tamām misre haiñ mere nayā purānā kyā

na dhar le ruup kabhī jhoñk meñ talātum kā

vo narm-rau hai nadī kā magar Thikānā kyā

karo to muñh pe malāmat karo mirī 'saurabh'

ye merī piiTh ke pīchhe se phusphusānā kyā

mila na khet se us ko bhi aab-o-dana kya

kisan shahr ko phir ek hua rawana kya

kahan se lae ho palkon pe tum guhar itne

tumhaare hath laga hai koi KHazana kya

faza ka habs kisi taur ab nahin jata

ki talKH dhup kya mausam koi suhana kya

tamam tarah ke samjhaute karne paDte hain

miyan mazaq grihasti ko hai chalana kya

gunah kuchh to mujhe be-tarah lubhate hain

ye raaz khol hi deta hun ab chhupana kya

ho dushmani bhi kisi se to daimi kyun ho

jo TuT jae zara mein wo dostana kya

KHabar-nawes nahin hun main ek shaer hun

tamam misre hain mere naya purana kya

na dhar le rup kabhi jhonk mein talatum ka

wo narm-rau hai nadi ka magar Thikana kya

karo to munh pe malamat karo meri 'saurabh'

ye meri piTh ke pichhe se phusphusana kya