milan rut ke hasin sapne zara tabir karte hain

milan rut ke hasīñ sapne zarā ta.abīr karte haiñ

chalo in chāñd tāroñ ko yūñhī tasḳhīr karte haiñ

banā kar chāñd ko kashtī utar jaa.eñ kināre par

bhulā Dāleñ sabhī sadmāt jo dil-gīr karte haiñ

sabhī bāteñ sabhī qisse sabhī dukh bhuul kar apne

na.e qisse na.ī ġhazleñ koī tahrīr karte haiñ

jo lafzoñ aur ma.ānī se bahut hai māvarā pyāre

hai abjad se jo aage vo vafā tafsīr karte haiñ

bahut muñh-zor haiñ dekho nikal jaa.eñ na hāthoñ se

chalo uḌte hue lamhe yahīñ zanjīr karte haiñ

hasad kī aag ke sho.ale jo bhaḌkāte haiñ ai logo

jalāte haiñ ḳhud apnī jaañ jo ye taqsīr karte haiñ

shikārī nafs baiThā hai bichhā kar jaal har lamha

chalā kar tiir taqve ke use naḳhchīr karte haiñ

sukūt-e-shab ne dikhlā.e na.e taare tamannā ke

unheñ āñgan meñ laane kī koī tadbīr karte haiñ

rupahlī shaam ho yā hoñ savere arġhavānī se

'shafaq' rañgoñ ke sab manzar mujhe tasḳhīr karte haiñ

milan rut ke hasin sapne zara tabir karte hain

chalo in chand taron ko yunhi tasKHir karte hain

bana kar chand ko kashti utar jaen kinare par

bhula Dalen sabhi sadmat jo dil-gir karte hain

sabhi baaten sabhi qisse sabhi dukh bhul kar apne

nae qisse nai ghazlen koi tahrir karte hain

jo lafzon aur maani se bahut hai mawara pyare

hai abjad se jo aage wo wafa tafsir karte hain

bahut munh-zor hain dekho nikal jaen na hathon se

chalo uDte hue lamhe yahin zanjir karte hain

hasad ki aag ke shoale jo bhaDkate hain ai logo

jalate hain KHud apni jaan jo ye taqsir karte hain

shikari nafs baiTha hai bichha kar jal har lamha

chala kar tir taqwe ke use naKHchir karte hain

sukut-e-shab ne dikhlae nae tare tamanna ke

unhen aangan mein lane ki koi tadbir karte hain

rupahli sham ho ya hon sawere arghawani se

'shafaq' rangon ke sab manzar mujhe tasKHir karte hain