mile ghairon se mujhko ranj o gham yun bhi hai aur yun bhi

mile ġhairoñ se mujh ko ranj o ġham yuuñ bhī hai aur yuuñ bhī

vafā-dushman jafā-jū kā sitam yuuñ bhī hai aur yuuñ bhī

kahīñ vāmiq kahīñ majnūñ raqam yuuñ bhī hai aur yuuñ bhī

hamāre naam par chaltā qalam yuuñ bhī hai aur yuuñ bhī

shab-e-vāda vo aa jaa.eñ na aa.eñ mujh ko bulvā leñ

ināyat yuuñ bhī hai aur yuuñ bhī karam yuuñ bhī hai aur yuuñ bhī

udū likkhe mujhe naama tumhārī mohr us kā ḳhat

jafā yuuñ bhī hai aur yuuñ bhī sitam yuuñ bhī hai aur yuuñ bhī

na ḳhud aa.eñ na bulvā.eñ shikāyat kyuuñ na likh bhejūñ

ināyat kī nazar mujh par karam yuuñ bhī hai aur yuuñ bhī

ye masjid hai ye mai-ḳhāna ta.ajjub is par aatā hai

janāb-e-shaiḳh kā naqsh-e-qadam yuuñ bhī hai aur yuuñ bhī

tujhe navvāb bhī kahte haiñ shā.ir bhī samajhte haiñ

zamāne meñ tirā 'sā.el' bharam yuuñ bhī hai aur yuuñ bhī

mile ghairon se mujh ko ranj o gham yun bhi hai aur yun bhi

wafa-dushman jafa-ju ka sitam yun bhi hai aur yun bhi

kahin wamiq kahin majnun raqam yun bhi hai aur yun bhi

hamare nam par chalta qalam yun bhi hai aur yun bhi

shab-e-wada wo aa jaen na aaen mujh ko bulwa len

inayat yun bhi hai aur yun bhi karam yun bhi hai aur yun bhi

udu likkhe mujhe nama tumhaari mohr us ka KHat

jafa yun bhi hai aur yun bhi sitam yun bhi hai aur yun bhi

na KHud aaen na bulwaen shikayat kyun na likh bhejun

inayat ki nazar mujh par karam yun bhi hai aur yun bhi

ye masjid hai ye mai-KHana tajjub is par aata hai

janab-e-shaiKH ka naqsh-e-qadam yun bhi hai aur yun bhi

tujhe nawwab bhi kahte hain shair bhi samajhte hain

zamane mein tera 'sael' bharam yun bhi hai aur yun bhi