ملے کیوں کر سکوں جب تک یہ تنہائی نہیں جاتی

ملے کیوں کر سکوں جب تک یہ تنہائی نہیں جاتی

وہ الجھن ہے طبیعت میں کہ سلجھائی نہیں جاتی

یہ کیسا خوف کیوں بیداد فرمائی نہیں جاتی

اجی بھولو قیامت کو ابھی آئی نہیں جاتی

تعجب ہے نمکداں پر نمکداں ہو چکے خالی

بلا کے زخم دل ٹھہرے کہ گہرائی نہیں جاتی

سمجھ لے یا تو کچھ میری سمجھ کا پھیر ہے ناصح

تجھی سے یا مرے مطلب کی سمجھائی نہیں جاتی

جو کچھ بیتی شب غم مجھ پہ سو بیتی چلو چھوڑو

گئی گزری کہانی مجھ سے دہرائی نہیں جاتی

رکیں اشک مسلسل چشم پر نم سے ارے توبہ

یہ بدلی خود برس پڑتی ہے برسائی نہیں جاتی