ملے سراغ تو منزل کا یوں سراغ ملے

ملے سراغ تو منزل کا یوں سراغ ملے

کف حسیں پہ جلائے کوئی چراغ ملے

فضول دورئ منزل کا ذکر ہے یارو

تڑپ نہیں ہے تو منزل کا کیا سراغ ملے

کلی کلی تھی فسردہ اداس اداس تھے پھول

گمان جن پہ ہو جنگل کا ایسے باغ ملے

نباہ کیسے دل سادہ ان سے کر پاتا

قدم تھے خاک پہ اور عرش پر دماغ ملے

عجیب بات ہے دل کو نہ کر سکیں روشن

مہہ‌ و نجوم سا روشن جنہیں دماغ ملے

لہو نچوڑ دیں رگ رگ سے اور بھر ڈالیں

مئے نشاط سے خالی اگر ایاغ ملے

مرے لیے کسی دولت سے کم نہیں رازیؔ

خوشا نصیب کہ احباب ہی سے داغ ملے