mili hai dard ki neamat nishat-e-jaan ke liye

milī hai dard kī ne.amat nishāt-e-jāñ ke liye

na āh-o-nāla kī ḳhātir na kuchh fuġhāñ ke liye

na kuchh zamīñ ke liye hai na kuchh zamāñ ke liye

na kuchh makīñ ke liye hai na kuchh makāñ ke liye

na ilm-o-fazl kī bāteñ na ilm-o-fazl meñ daḳhl

na kuchh adab ke liye hai na kuchh bayāñ ke liye

hazār tarah ke sāmāñ hayāt-e-fānī meñ

kiye haiñ jam.a kisī ne to phir kahāñ ke liye

shuā-e-barq-o-sharar chun ke ham ne rakkhī hai

nihāl-e-ḳhushk pa tāmīr-e-āshiyāñ ke liye

tumheñ na hai koī nisbat mirī kahānī se

tumhārā naam to hai zeb-e-dāstāñ ke liye

zabāñ pe aa hī gayā jab ki terā nām-e-jamīl

dahān-e-nutq ne bose mirī zabāñ ke liye

nahīñ majāl-e-suḳhan us ke rū-ba-rū 'arshad'

kahāñ se lā.ūñ maiñ tāb-o-tavāñ zabāñ ke liye

mili hai dard ki neamat nishat-e-jaan ke liye

na aah-o-nala ki KHatir na kuchh fughan ke liye

na kuchh zamin ke liye hai na kuchh zaman ke liye

na kuchh makin ke liye hai na kuchh makan ke liye

na ilm-o-fazl ki baaten na ilm-o-fazl mein daKHl

na kuchh adab ke liye hai na kuchh bayan ke liye

hazar tarah ke saman hayat-e-fani mein

kiye hain jama kisi ne to phir kahan ke liye

shua-e-barq-o-sharar chun ke hum ne rakkhi hai

nihaal-e-KHushk pa tamir-e-ashiyan ke liye

tumhein na hai koi nisbat meri kahani se

tumhaara nam to hai zeb-e-dastan ke liye

zaban pe aa hi gaya jab ki tera nam-e-jamil

dahan-e-nutq ne bose meri zaban ke liye

nahin majal-e-suKHan us ke ru-ba-ru 'arshad'

kahan se laun main tab-o-tawan zaban ke liye