mili hai pyar ki KHushbu jo mere aangan mein

milī hai pyaar kī ḳhushbū jo mere āñgan meñ

sabā ne jā ke ye qisse kahe haiñ gulshan meñ

chhalak rahā hai basantī ḳhumār āñkhoñ se

kabhī jo dekh liyā maiñ ne un ko chilman meñ

sabā jo chhū ke chalī hai kisī ke aariz ko

bahār ḳhud hī larazne lagī hai gulshan meñ

shafaq laboñ pe yahāñ hai vahāñ bahār aa.ī

'nasīm' jaane kahāñ paḌ ga.ī hai uljhan meñ

mile laboñ ke ujāle to gesuoñ kī mahak

ḳhirām-e-nik.hat-e-gul meñ sabā kī dhaḌkan meñ

nigāh-e-dil kā taqāza yahī to hai 'anvar'

gire jo ashk vo ban jaa.e phuul dāman meñ

mili hai pyar ki KHushbu jo mere aangan mein

saba ne ja ke ye qisse kahe hain gulshan mein

chhalak raha hai basanti KHumar aankhon se

kabhi jo dekh liya main ne un ko chilman mein

saba jo chhu ke chali hai kisi ke aariz ko

bahaar KHud hi larazne lagi hai gulshan mein

shafaq labon pe yahan hai wahan bahaar aai

'nasim' jaane kahan paD gai hai uljhan mein

mile labon ke ujale to gesuon ki mahak

KHiram-e-nikhat-e-gul mein saba ki dhaDkan mein

nigah-e-dil ka taqaza yahi to hai 'anwar'

gire jo ashk wo ban jae phul daman mein