mili hum ko rahat musibat ke baad

milī ham ko rāhat musībat ke baad

ye din haath aaya hai muddat ke baad

musībat nahīñ uThtī rāhat ke baad

qayāmat hai iflās sarvat ke baad

maiñ kahtā huuñ chupke se ab pher do

mirā dil mujhe tum ḳhayānat ke baad

hai saaqī ko shāyad ki ḳhauf-e-ḳhudā

pilātā hai zāhid ko hujjat ke baad

bakheḌe haiñ sau zindagī meñ to kyā

marāhil hazāroñ haiñ rehlat ke baad

rulāyā rulā kar hañsāyā mujhe

ye shoḳhī to dekho sharārat ke baad

shab-e-hijr kahtā hai roz-e-firāq

phir ik hashr hai is qayāmat ke baad

duā hai mirī dil se ye dam-ba-dam

na ho sub.h-e-ġham shām-e-ishrat ke baad

zamāne ne jo kuchh diyā le liyā

milīñ talḳhiyāñ bhī halāvat ke baad

ye qismat kahāñ ye muqaddar kahāñ

ki phir roz-e-vasl aa.e furqat ke baad

hai 'mas.ūd' pesh-e-nazar roz-e-hijr

uThānā paḌā ranj rāhat ke baad

mili hum ko rahat musibat ke baad

ye din hath aaya hai muddat ke baad

musibat nahin uThti rahat ke baad

qayamat hai iflas sarwat ke baad

main kahta hun chupke se ab pher do

mera dil mujhe tum KHayanat ke baad

hai saqi ko shayad ki KHauf-e-KHuda

pilata hai zahid ko hujjat ke baad

bakheDe hain sau zindagi mein to kya

marahil hazaron hain rehlat ke baad

rulaya rula kar hansaya mujhe

ye shoKHi to dekho shararat ke baad

shab-e-hijr kahta hai roz-e-firaq

phir ek hashr hai is qayamat ke baad

dua hai meri dil se ye dam-ba-dam

na ho subh-e-gham sham-e-ishrat ke baad

zamane ne jo kuchh diya le liya

milin talKHiyan bhi halawat ke baad

ye qismat kahan ye muqaddar kahan

ki phir roz-e-wasl aae furqat ke baad

hai 'masud' pesh-e-nazar roz-e-hijr

uThana paDa ranj rahat ke baad