milne ki tarah humse wo ab tak kahan mile

milne kī tarah ham se vo ab tak kahāñ mile

kam-kam mile kashīda mile bad-gumāñ mile

ai kaash zindagī ko vo jazb-e-nihāñ mile

dekhe mujhe koī to tumhārā nishāñ mile

kis hausle se ham ne basar kī hai zindagī

tūfāñ se bhī mile to ba-azm-e-javāñ mile

nabz-e-chaman pe baad meñ rakkheñge uñgliyāñ

pahle tirā mizāj to ai bāġhbāñ mile

rāhat kī saañs rahzan-e-zauq-e-safar huī

lamhe masarratoñ ke ġhamoñ se girāñ mile

jab sohbat-e-chaman se hī dil apnā bujh gayā

karnā hai kyā bahār mile yā ḳhizāñ mile

kyā jaane kyoñ kisī se dil apnā na mil sakā

milne ke vāste to ka.ī mehrbāñ mile

dariyā lahū kā shahr kī galiyoñ meñ thā ravāñ

aḳhbār meñ likhe hue amn-o-amāñ mile

vo pesh-pesh the jinheñ hosh-e-safar na thā

jo manzil-āshnā the pas-e-kārvāñ mile

har ġham se mustaqil hai ta.alluq hayāt kā

dekheñ kahāñ se silsila-e-dāstāñ mile

phūloñ ko lab-kushā.ī kā haq hai chaman meñ 'shauq'

zaḳhmoñ ko kam se kam kabhī izn-e-bayāñ mile

milne ki tarah hum se wo ab tak kahan mile

kam-kam mile kashida mile bad-guman mile

ai kash zindagi ko wo jazb-e-nihan mile

dekhe mujhe koi to tumhaara nishan mile

kis hausle se hum ne basar ki hai zindagi

tufan se bhi mile to ba-azm-e-jawan mile

nabz-e-chaman pe baad mein rakkhenge ungliyan

pahle tera mizaj to ai baghban mile

rahat ki sans rahzan-e-zauq-e-safar hui

lamhe masarraton ke ghamon se giran mile

jab sohbat-e-chaman se hi dil apna bujh gaya

karna hai kya bahaar mile ya KHizan mile

kya jaane kyon kisi se dil apna na mil saka

milne ke waste to kai mehrban mile

dariya lahu ka shahr ki galiyon mein tha rawan

aKHbar mein likhe hue amn-o-aman mile

wo pesh-pesh the jinhen hosh-e-safar na tha

jo manzil-ashna the pas-e-karwan mile

har gham se mustaqil hai talluq hayat ka

dekhen kahan se silsila-e-dastan mile

phulon ko lab-kushai ka haq hai chaman mein 'shauq'

zaKHmon ko kam se kam kabhi izn-e-bayan mile