milne ko tujhse dil to mera be-qarar hai

milne ko tujh se dil to mirā be-qarār hai

tū aa ke mil na mil ye tirā iḳhtiyār hai

jis jis ke paas dosto jis jis kā yaar hai

behtar chaman se ghar meñ isī ke bahār hai

tum zaḳhm-e-dil kī mere ḳhabar pūchhte ho kyā

tīr-e-nigāh dil ke to ab vār-pār hai

gar dushmanī pe dost ne bāñdhī mire kamar

dushman hai ab jo koī mirā dost-dār hai

lagtī nahīñ palak se mirī ab zarā palak

aane kā is ke jab se mujhe intizār hai

ai shahsavār us ko bhī kar le tū ab shikār

ye said-e-dil bhī umr se ummīd-vār hai

ye kuchh to haal tere divāne kā ab huā

jīdhar ko jaave aah use maar maar hai

ai gul tujhe aziiz huuñ rakhtā maiñ is liye

yaanī ki tujh meñ ek ramaq bū-e-yār hai

ye kis ke dil ko chhīn ke karte haiñ pā.emāl

in zālimoñ kā aah yahī kārobār hai

'āsif' ḳhudā ke vāste mat de butoñ ko dil

ye vo haiñ jin ke qaul kā kyā e'tibār hai

milne ko tujh se dil to mera be-qarar hai

tu aa ke mil na mil ye tera iKHtiyar hai

jis jis ke pas dosto jis jis ka yar hai

behtar chaman se ghar mein isi ke bahaar hai

tum zaKHm-e-dil ki mere KHabar puchhte ho kya

tir-e-nigah dil ke to ab war-par hai

gar dushmani pe dost ne bandhi mere kamar

dushman hai ab jo koi mera dost-dar hai

lagti nahin palak se meri ab zara palak

aane ka is ke jab se mujhe intizar hai

ai shahsawar us ko bhi kar le tu ab shikar

ye said-e-dil bhi umr se ummid-war hai

ye kuchh to haal tere diwane ka ab hua

jidhar ko jawe aah use mar mar hai

ai gul tujhe aziz hun rakhta main is liye

yani ki tujh mein ek ramaq bu-e-yar hai

ye kis ke dil ko chhin ke karte hain paemal

in zalimon ka aah yahi karobar hai

'asif' KHuda ke waste mat de buton ko dil

ye wo hain jin ke qaul ka kya e'tibar hai