milta hai qaid-e-gham mein bhi lutf-e-faza-e-bagh

miltā hai qaid-e-ġham meñ bhī lutf-e-fazā-e-bāġh

chāk-e-qafas se aatī hai farfar havā-e-bāġh

roke zabāñ na bulbul-e-bustāñ sarā-e-bāġh

dohrā.e phir mire se kaho mājrā-e-bāġh

sunte haiñ ab kī aa.ī hai kis dhuum se bahār

kyā jī phaḌak rahā hai qafas meñ barā.e baaġh

kin chahchahoñ meñ apnī basar hotī thī mudām

ai ham-safīr kyā ho bayāñ mājrā-e-bāġh

guzre nasīm idhar se to pūchheñge ham asiir

ham ko bhī yaad karte haiñ naġhma-sarā-e-bāġh

ai ham-safīr ab to chale qaid ho ke ham

taqdīr dekhiye hameñ phir kab dikhā.e baaġh

mujh mast kā chaman meñ shanāsā koī nahīñ

ik duḳht-e-raz qadīm se hai āshnā-e-bāġh

paate haiñ sarv-e-gul meñ tirī shakl qadd-o-ruḳh

furqat meñ jī kahīñ nahīñ lagtā sivā.e baaġh

us din se apne bulbul-e-dil ko hai ishq-e-gul

gulzār-e-dahr meñ huī jaise binā-e-bāġh

miltā nahīñ hai naḳhl-e-tamannā se yaañ samar

phir koī kis umiid pe is jā lagā.e baaġh

nargis kī hai vo aañkh na gul kā vo rañg hai

chaltī hai ab kī saal muḳhālif havā-e-bāġh

ab chahchahe haiñ vo na navā-sanjiyāñ haiñ vo

shāyad guzar gayā 'qalaq'-e-ḳhush-navā-e-bāġh

milta hai qaid-e-gham mein bhi lutf-e-faza-e-bagh

chaak-e-qafas se aati hai farfar hawa-e-bagh

roke zaban na bulbul-e-bustan sara-e-bagh

dohrae phir mere se kaho majra-e-bagh

sunte hain ab ki aai hai kis dhum se bahaar

kya ji phaDak raha hai qafas mein barae bagh

kin chahchahon mein apni basar hoti thi mudam

ai ham-safir kya ho bayan majra-e-bagh

guzre nasim idhar se to puchhenge hum asir

hum ko bhi yaad karte hain naghma-sara-e-bagh

ai ham-safir ab to chale qaid ho ke hum

taqdir dekhiye hamein phir kab dikhae bagh

mujh mast ka chaman mein shanasa koi nahin

ek duKHt-e-raz qadim se hai aashna-e-bagh

pate hain sarw-e-gul mein teri shakl qadd-o-ruKH

furqat mein ji kahin nahin lagta siwae bagh

us din se apne bulbul-e-dil ko hai ishq-e-gul

gulzar-e-dahr mein hui jaise bina-e-bagh

milta nahin hai naKHl-e-tamanna se yan samar

phir koi kis umid pe is ja lagae bagh

nargis ki hai wo aankh na gul ka wo rang hai

chalti hai ab ki sal muKHalif hawa-e-bagh

ab chahchahe hain wo na nawa-sanjiyan hain wo

shayad guzar gaya 'qalaq'-e-KHush-nawa-e-bagh