ملتا ہوں پہ خوش بخت ستاروں سے بہت کم

ملتا ہوں پہ خوش بخت ستاروں سے بہت کم

اور اس پہ مزید اپنے ارادوں سے بہت کم

کیا خاک مجھے ملتے ترے نقش کف پا

گزرا تھا مگر دشت کی راہوں سے بہت کم

اب وہ بھی نہیں پوچھتا احوال صبا سے

میرا بھی تعلق ہے ہواؤں سے بہت کم

ڈوبوں گا تو دریا کی حدوں سے بھی پرے تک

ابھروں گا تو پھر تیرے تقاضوں سے بہت کم

وہ شخص جتاتا ہے ہر اک پل کہ محبت

ہے اہم مگر دوسرے رشتوں سے بہت کم

اب میں بھی سمٹنے میں کیا کرتا ہوں تاخیر

آتی ہے صدا اس کی بھی بانہوں سے بہت کم

جاں رکھ کے ہتھیلی پہ یہاں چیخئے صادقؔ

یہ لوگ پگھلتے ہیں پر آہوں سے بہت کم