milta hun pe KHush-baKHt sitaron se bahut kam

miltā huuñ pe ḳhush-baḳht sitāroñ se bahut kam

aur is pe mazīd apne irādoñ se bahut kam

kyā ḳhaak mujhe milte tire naqsh-e-kaf-e-pā

guzrā thā magar dasht kī rāhoñ se bahut kam

ab vo bhī nahīñ pūchhtā ahvāl sabā se

merā bhī ta'alluq hai havāoñ se bahut kam

Dūbūñgā to dariyā kī hadoñ se bhī pare tak

ubhrūñgā to phir tere taqāzoñ se bahut kam

vo shaḳhs jatātā hai har ik pal ki mohabbat

hai ahm magar dūsre rishtoñ se bahut kam

ab maiñ bhī simaTne meñ kiyā kartā huuñ tāḳhīr

aatī hai sadā us kī bhī bāñhoñ se bahut kam

jaañ rakh ke hathelī pe yahāñ chīḳhiye 'sādiq'

ye log pighalte haiñ par aahoñ se bahut kam

milta hun pe KHush-baKHt sitaron se bahut kam

aur is pe mazid apne iradon se bahut kam

kya KHak mujhe milte tere naqsh-e-kaf-e-pa

guzra tha magar dasht ki rahon se bahut kam

ab wo bhi nahin puchhta ahwal saba se

mera bhi ta'alluq hai hawaon se bahut kam

Dubunga to dariya ki hadon se bhi pare tak

ubhrunga to phir tere taqazon se bahut kam

wo shaKHs jatata hai har ek pal ki mohabbat

hai ahm magar dusre rishton se bahut kam

ab main bhi simaTne mein kiya karta hun taKHir

aati hai sada us ki bhi banhon se bahut kam

jaan rakh ke hatheli pe yahan chiKHiye 'sadiq'

ye log pighalte hain par aahon se bahut kam