milta jo koi TukDa is charKH-e-zabarjad mein

miltā jo koī TukḌā is charḳh-e-zabarjad meñ

paivand lagā detā maiñ nafs-e-mujarrad meñ

bedāri-e-furqat meñ thā ramz qayāmat kā

jaagā huuñ ki niiñd aa.e tārīki-e-marqad meñ

is daftar-e-hastī meñ tā'līm bahut kam hai

do harf nazar aa.e dībācha-e-abjad meñ

go ḳhaak kā putlā huuñ lekin koī kyā samjhe

maiñ bhī koī shai huuñ jo gardūñ hai mirī kad meñ

hai zabt kī farmā.ish is dil se bahut bejā

ye qulzum-e-lā-sāhil kis tarah rahe had meñ

pahlū meñ nahīñ dil to dil-soz hī aa jaatā

ik sham' to jal jaatī tārīki-e-marqad meñ

nāloñ se ye kahtā huuñ himmat se na dil hāreñ

tāroñ ne jagah kar lī is lauh-e-zamurrad meñ

milta jo koi TukDa is charKH-e-zabarjad mein

paiwand laga deta main nafs-e-mujarrad mein

bedari-e-furqat mein tha ramz qayamat ka

jaga hun ki nind aae tariki-e-marqad mein

is daftar-e-hasti mein ta'lim bahut kam hai

do harf nazar aae dibacha-e-abjad mein

go KHak ka putla hun lekin koi kya samjhe

main bhi koi shai hun jo gardun hai meri kad mein

hai zabt ki farmaish is dil se bahut beja

ye qulzum-e-la-sahil kis tarah rahe had mein

pahlu mein nahin dil to dil-soz hi aa jata

ek sham' to jal jati tariki-e-marqad mein

nalon se ye kahta hun himmat se na dil haaren

taron ne jagah kar li is lauh-e-zamurrad mein