milte hi bebak thi wo aankh sharmai hui

milte hī bebāk thī vo aañkh sharmā.ī huī

phir ga.ī pachhtā ke palkoñ tak hayā aa.ī huī

har adā mastāna sar se paañv tak chhā.ī huī

uf tirī kāfir javānī josh par aa.ī huī

mujh ko ye da.avā koī tere sivā dil meñ nahīñ

us kā ye ilzām achchhī qaid-e-tanhā.ī huī

bhole ban kar un ke muñh se sun liyā hāl-e-raqīb

umr-bhar meñ ek hī to ham se dānā.ī huī

bosa le kar jaan Daalī ġhair kī tasvīr meñ

ye nayā e.ajāz ye achchhī masīhā.ī huī

dekh kar qātil kī aamad 'dāġh' dil meñ shaad shaad

aur ġham-ḳhvāroñ ke muñh par murdanī chhā.ī huī

milte hi bebak thi wo aankh sharmai hui

phir gai pachhta ke palkon tak haya aai hui

har ada mastana sar se panw tak chhai hui

uf teri kafir jawani josh par aai hui

mujh ko ye dawa koi tere siwa dil mein nahin

us ka ye ilzam achchhi qaid-e-tanhai hui

bhole ban kar un ke munh se sun liya haal-e-raqib

umr-bhar mein ek hi to hum se danai hui

bosa le kar jaan Dali ghair ki taswir mein

ye naya eajaz ye achchhi masihai hui

dekh kar qatil ki aamad 'dagh' dil mein shad shad

aur gham-KHwaron ke munh par murdani chhai hui