ملتے جو رہے سب نے کہا عید مبارک

ملتے جو رہے سب نے کہا عید مبارک

پر اس کی تھا آنکھوں میں جدا عید مبارک

بچوں کے جو ہاتھوں پہ سہانی سی مہک ہے

ہنستے ہوئے کہتی ہے حنا عید مبارک

کچھ شیخ نے گرمایا ہے ایمان بھی ایسے

کہنے لگی شعلوں سے ہوا عید مبارک

کلیاں تھیں جواں اور حیا رسم گلستاں

پھولوں نے بھی بھنوروں سے کہا عید مبارک

چمکی ہیں ضیا بار مہ نو سے دشائیں

ذروں سے بھی کہتی ہے فضا عید مبارک

پھولوں نے جو پہنی تھیں تبسم کی قبائیں

کہنے لگی خوشبو سے صبا عید مبارک

ملنے کا شہابؔ اس کا ارادہ تو نہیں تھا

رسماً ہی ملا مجھ سے کہا عید مبارک