منبر و محراب میں سب بجھ گئے رکھے ہوئے

منبر و محراب میں سب بجھ گئے رکھے ہوئے

ہم جلے ہیں ہم کہ جو تھے طاق پہ رکھے ہوئے

رائگانی سے کہیں بڑھ کے ہے رنج بے بسی

ڈھل رہے ہیں ہم ہمارے سامنے رکھے ہوئے

اس نے مجھ کو چھوڑ کر بھی اس لئے چھوڑا نہ تھا

کام آ جاتے ہیں اک دن رابطے رکھے ہوئے

دیر بس اک جنبش حالات ہونے کی ہوئی

گر پڑے طشت فلک میں حادثے رکھے ہوئے

بارشوں سے دھل گیا ہوگا رخ شب کا غبار

دکھ رہے ہوں گے پہاڑوں پر دیے رکھے ہوئے

بزم یاراں میں ہمارا ذکر آتے ہی ظہیرؔ

رہ گئے ہوں گے پیالے بن پئے رکھے ہوئے