mimbar-o-mehrab mein sab bujh gae rakkhe hue

mimbar-o-mehrāb meñ sab bujh ga.e rakkhe hue

ham jale haiñ ham ki jo the taaq pe rakkhe hue

rā.igānī se kahīñ baḌh ke hai ranj-e-bebasī

Dhal rahe haiñ ham hamāre sāmne rakkhe hue

us ne mujh ko chhoḌ kar bhī is liye chhoḌā na thā

kaam aa jaate haiñ ik din rābte rakkhe hue

der bas ik jumbish-e-hālāt hone kī huī

gir paḌe tasht-e-falak meñ hādse rakkhe hue

bārishoñ se dhul gayā hogā ruḳh-e-shab kā ġhubār

dikh rahe hoñge pahāḌoñ par diye rakkhe hue

bazm-e-yārāñ meñ hamārā zikr aate hī 'zahīr'

rah ga.e hoñge piyāle bin piye rakkhe hue

mimbar-o-mehrab mein sab bujh gae rakkhe hue

hum jale hain hum ki jo the taq pe rakkhe hue

raigani se kahin baDh ke hai ranj-e-bebasi

Dhal rahe hain hum hamare samne rakkhe hue

us ne mujh ko chhoD kar bhi is liye chhoDa na tha

kaam aa jate hain ek din rabte rakkhe hue

der bas ek jumbish-e-haalat hone ki hui

gir paDe tasht-e-falak mein hadse rakkhe hue

barishon se dhul gaya hoga ruKH-e-shab ka ghubar

dikh rahe honge pahaDon par diye rakkhe hue

bazm-e-yaran mein hamara zikr aate hi 'zahir'

rah gae honge piyale bin piye rakkhe hue