minnat-kash-e-ilaj-e-masiha nahin raha

minnat-kash-e-ilāj-e-masīhā nahīñ rahā

kyā ġham agar maraz se ifāqa nahīñ rahā

kasrat meñ imtiyāz hai vahdat meñ kuchh nahīñ

qatra milā jo bahr meñ qatra nahīñ rahā

dil meñ to jalva-gar haiñ nigāhoñ se duur haiñ

parde kī baat ye hai ki parda nahīñ rahā

jo bhī rahā amal ke natā.ej se be-niyāz

hargiz vo nā-murād-e-tamannā nahīñ rahā

jis meñ ḳhudī nahīñ use jiine kā haq nahīñ

yaksāñ hai vo jahāñ meñ rahā yā nahīñ rahā

haañ āsmān-e-ġham mujhe ahl-e-zamīñ kaheñ

kab tār-e-ashk rashk-e-surayyā nahīñ rahā

'zā.iq' agar ho kahnī to kahiye mufīd baat

harzā-sarā.iyoñ kā zamāna nahīñ rahā

minnat-kash-e-ilaj-e-masiha nahin raha

kya gham agar maraz se ifaqa nahin raha

kasrat mein imtiyaz hai wahdat mein kuchh nahin

qatra mila jo bahr mein qatra nahin raha

dil mein to jalwa-gar hain nigahon se dur hain

parde ki baat ye hai ki parda nahin raha

jo bhi raha amal ke nataej se be-niyaz

hargiz wo na-murad-e-tamanna nahin raha

jis mein KHudi nahin use jine ka haq nahin

yaksan hai wo jahan mein raha ya nahin raha

han aasman-e-gham mujhe ahl-e-zamin kahen

kab tar-e-ashk rashk-e-surayya nahin raha

'zaiq' agar ho kahni to kahiye mufid baat

harza-saraiyon ka zamana nahin raha