minnaton se bhi na wo hur-shamail aaya

minnatoñ se bhī na vo hūr-shamā.il aayā

kis jagah aañkh laḌī haa.e kahāñ dil aayā

ham na kahte the na kar ishq pashemāñ hogā

jo kiyā tū ne vo aage tire ai dil aayā

qahqahe qulqul-e-mīnā ne lagā.e kyā kyā

mujh ko mastī meñ jo ronā sar-e-mahfil aayā

qatl kī sun ke ḳhabar iid manā.ī maiñ ne

aaj jis se mujhe milnā thā gale mil aayā

tā dam-e-marg na ho vo mire dushman ko nasīb

jo mazā mujh ko ilāhī dam-e-bismil aayā

marqad-e-qais par ab tak bhī to ḳhār-e-sahrā

uñgliyoñ se ye batāte haiñ vo mahmil aayā

ganj-e-qārūñ ke sivā bhī hai adam meñ sab kuchh

haa.e duniyā meñ na is mulk kā hāsil aayā

jis ne kuchh hosh sambhālā vo javāñ qatl huā

ahd-e-pīrī na tire ahd meñ qātil aayā

diin o duniyā se gayā tū ye samajh le ai 'dāġh'

ġhazab aayā agar us but pe tirā dil aayā

minnaton se bhi na wo hur-shamail aaya

kis jagah aankh laDi hae kahan dil aaya

hum na kahte the na kar ishq pasheman hoga

jo kiya tu ne wo aage tere ai dil aaya

qahqahe qulqul-e-mina ne lagae kya kya

mujh ko masti mein jo rona sar-e-mahfil aaya

qatl ki sun ke KHabar id manai main ne

aaj jis se mujhe milna tha gale mil aaya

ta dam-e-marg na ho wo mere dushman ko nasib

jo maza mujh ko ilahi dam-e-bismil aaya

marqad-e-qais par ab tak bhi to KHar-e-sahra

ungliyon se ye batate hain wo mahmil aaya

ganj-e-qarun ke siwa bhi hai adam mein sab kuchh

hae duniya mein na is mulk ka hasil aaya

jis ne kuchh hosh sambhaala wo jawan qatl hua

ahd-e-piri na tere ahd mein qatil aaya

din o duniya se gaya tu ye samajh le ai 'dagh'

ghazab aaya agar us but pe tera dil aaya