KHush-qadan jab sawar hote hain

ḳhush-qadāñ jab savār hote haiñ

sarv-o-qumrī shikār hote haiñ

tere bāloñ ke vasf meñ mere

sher sab pechdār hote haiñ

aao yād-e-butāñ pa bhuul na jaao

ye taġhāful-shi.ār hote haiñ

dekh leveñge ġhair ko tujh paas

sohbatoñ meñ bhī yaar hote haiñ

sadqe ho leveñ ek-dam tere

phir to tujh par nisār hote haiñ

tū kare hai qarār milne kā

ham abhī be-qarār hote haiñ

haf-iqlīm har galī hai kahīñ

dillī se bhī dayār hote haiñ

rafta rafta ye tifl-e-ḳhush-zāhir

fitna-e-rozgār hote haiñ

us ke nazdīk kuchh nahīñ izzat

'mīr'-jī yuuñ hī ḳhvār hote haiñ

KHush-qadan jab sawar hote hain

sarw-o-qumri shikar hote hain

tere baalon ke wasf mein mere

sher sab pechdar hote hain

aao yaad-e-butan pa bhul na jao

ye taghaful-shiar hote hain

dekh lewenge ghair ko tujh pas

sohbaton mein bhi yar hote hain

sadqe ho lewen ek-dam tere

phir to tujh par nisar hote hain

tu kare hai qarar milne ka

hum abhi be-qarar hote hain

haf-iqlim har gali hai kahin

dilli se bhi dayar hote hain

rafta rafta ye tifl-e-KHush-zahir

fitna-e-rozgar hote hain

us ke nazdik kuchh nahin izzat

'mir'-ji yun hi KHwar hote hain