KHubi ka uski bas-ki talabgar ho gaya

ḳhūbī kā us kī bas-ki talabgār ho gayā

gul baaġh meñ gale kā mire haar ho gayā

kis ko nahīñ hai shauq tirā par na is qadar

maiñ to usī ḳhayāl meñ bīmār ho gayā

maiñ nau-damīda baal chaman-zād-e-tair thā

par ghar se uTh chalā so giraftār ho gayā

Thahrā gayā na ho ke harīf us kī chashm kā

siine ko toḌ tīr-e-nigah paar ho gayā

hai us ke harf zer-e-labī kā sabhoñ meñ zikr

kyā baat thī ki jis kā ye bistār ho gayā

to vo matā.a hai ki paḌī jis kī tujh pe aañkh

vo jī ko bech kar bhī ḳharīdār ho gayā

kyā kahiye āh-e-ishq meñ ḳhūbī nasīb kī

dildār apnā thā so dil-āzār ho gayā

āThoñ pahar lagā hī phire hai tumhāre saath

kuchh in dinoñ maiñ ġhair bahut yaar ho gayā

kab ro hai us se baat ke karne kā mujh ko 'mīr'

nā-karda jurm meñ tū gunahgār ho gayā

KHubi ka us ki bas-ki talabgar ho gaya

gul bagh mein gale ka mere haar ho gaya

kis ko nahin hai shauq tera par na is qadar

main to usi KHayal mein bimar ho gaya

main nau-damida baal chaman-zad-e-tair tha

par ghar se uTh chala so giraftar ho gaya

Thahra gaya na ho ke harif us ki chashm ka

sine ko toD tir-e-nigah par ho gaya

hai us ke harf zer-e-labi ka sabhon mein zikr

kya baat thi ki jis ka ye bistar ho gaya

to wo mataa hai ki paDi jis ki tujh pe aankh

wo ji ko bech kar bhi KHaridar ho gaya

kya kahiye aah-e-ishq mein KHubi nasib ki

dildar apna tha so dil-azar ho gaya

aaThon pahar laga hi phire hai tumhaare sath

kuchh in dinon main ghair bahut yar ho gaya

kab ro hai us se baat ke karne ka mujh ko 'mir'

na-karda jurm mein tu gunahgar ho gaya