khowen hain nind meri musibat bayaniyan

khoveñ haiñ niiñd merī musībat bayāniyāñ

tum bhī to ek raat suno ye kahāniyāñ

kyā aag de ke taur ko kī tark sar-kashī

us sho'le kī vahī haiñ sharārat kī bāniyāñ

sohbat rakhā kiyā vo safīna-o-zalāl se

dil hī meñ ḳhuuñ huā kiiñ mirī nukta-dāniyāñ

ham se to kiine hī kī adā.eñ chalī ga.iiñ

be-lutfiyāñ yahī yahī nā-mehrbāniyāñ

talvār ke tale hī gayā ahd-e-imbisāt

mar mar ke ham ne kaaTī haiñ apnī javāniyāñ

gaalī sivā.e mujh se suḳhan mat kiyā karo

achchhī lage haiñ mujh ko tirī bad-zabāniyāñ

ġhairoñ hī ke suḳhan kī taraf gosh-e-yār the

is harf-e-nā-shino ne hamārī na māniyāñ

ye be-qarāriyāñ na kabhū in nai-dekhiyāñ

jāñ-kāhiyāñ hamārī bahut sahl jāniyāñ

maarā mujhe bhī saan ke ġhairoñ meñ un ne 'mīr'

kyā ḳhaak meñ milā.īñ mirī jāñ-fishāniyāñ

khowen hain nind meri musibat bayaniyan

tum bhi to ek raat suno ye kahaniyan

kya aag de ke taur ko ki tark sar-kashi

us sho'le ki wahi hain shararat ki baniyan

sohbat rakha kiya wo safina-o-zalal se

dil hi mein KHun hua kin meri nukta-daniyan

hum se to kine hi ki adaen chali gain

be-lutfiyan yahi yahi na-mehrbaniyan

talwar ke tale hi gaya ahd-e-imbisat

mar mar ke hum ne kaTi hain apni jawaniyan

gali siwae mujh se suKHan mat kiya karo

achchhi lage hain mujh ko teri bad-zabaniyan

ghairon hi ke suKHan ki taraf gosh-e-yar the

is harf-e-na-shino ne hamari na maniyan

ye be-qarariyan na kabhu in nai-dekhiyan

jaan-kahiyan hamari bahut sahl jaaniyan

mara mujhe bhi san ke ghairon mein un ne 'mir'

kya KHak mein milain meri jaan-fishaniyan