bazm mein jo tera zuhur nahin

bazm meñ jo tirā zuhūr nahīñ

sham-e-raushan ke muñh pe nuur nahīñ

kitnī bāteñ banā ke lā.ūñ ek

yaad rahtī tire huzūr nahīñ

ḳhuub pahchāntā huuñ tere ta.iiñ

itnā bhī to maiñ be-shu.ūr nahīñ

qatl hī kar ki us meñ rāhat hai

lāzim us kaam meñ marūr nahīñ

fikr mat kar hamāre jiine kā

tere nazdīk kuchh ye duur nahīñ

phir jiyeñge jo tujh sā hai jāñ-baḳhsh

aisā jiinā hameñ zarūr nahīñ

aam hai yaar kī tajallī 'mīr'

ḳhaas muusā va koh-e-tūr nahīñ

bazm mein jo tera zuhur nahin

sham-e-raushan ke munh pe nur nahin

kitni baaten bana ke laun ek

yaad rahti tere huzur nahin

KHub pahchanta hun tere tain

itna bhi to main be-shuur nahin

qatl hi kar ki us mein rahat hai

lazim us kaam mein marur nahin

fikr mat kar hamare jine ka

tere nazdik kuchh ye dur nahin

phir jiyenge jo tujh sa hai jaan-baKHsh

aisa jina hamein zarur nahin

aam hai yar ki tajalli 'mir'

KHas musa wa koh-e-tur nahin