KHush na aai tumhaari chaal hamein

ḳhush na aa.ī tumhārī chaal hameñ

yuuñ na karnā thā pā.emāl hameñ

haal kyā pūchh pūchh jaate ho

kabhū paate bhī ho bahāl hameñ

vo dahāñ vo kamar hī hai maqsūd

aur kuchh ab nahīñ ḳhayāl hameñ

is mah-e-chārdah kī duurī ne

das hī din meñ kyā hilāl hameñ

nazar aate haiñ hote jī ke vabāl

halqa halqa tumhāre baal hameñ

tangī is jā kī naqal kyā kariye

yaañ se vājib hai intiqāl hameñ

sirf lillāh ḳham ke ḳham karte

na kyā charḳh ne kalāl hameñ

muġh-bache maal mast ham darvesh

kaun kartā hai musht-māl hameñ

kab tak us tañgnā meñ khīñchiye rañj

yaañ se yārab tū hī nikāl hameñ

tark sabzān-e-shahr kariye ab

bas bahut kar chuke nihāl hameñ

vaj.h kyā hai ki 'mīr' muñh pe tire

nazar aatā hai kuchh malāl hameñ

KHush na aai tumhaari chaal hamein

yun na karna tha paemal hamein

haal kya puchh puchh jate ho

kabhu pate bhi ho bahaal hamein

wo dahan wo kamar hi hai maqsud

aur kuchh ab nahin KHayal hamein

is mah-e-chaardah ki duri ne

das hi din mein kya hilal hamein

nazar aate hain hote ji ke wabaal

halqa halqa tumhaare baal hamein

tangi is ja ki naqal kya kariye

yan se wajib hai intiqal hamein

sirf lillah KHam ke KHam karte

na kya charKH ne kalal hamein

mugh-bache mal mast hum darwesh

kaun karta hai musht-mal hamein

kab tak us tangna mein khinchiye ranj

yan se yarab tu hi nikal hamein

tark sabzan-e-shahr kariye ab

bas bahut kar chuke nihaal hamein

wajh kya hai ki 'mir' munh pe tere

nazar aata hai kuchh malal hamein