jo main na hun to karo tark naz karne ko

jo maiñ na huuñ to karo tark naaz karne ko

koī to chāhiye jī bhī niyāz karne ko

na dekho ġhuncha-e-nargis kī or khulte meñ

jo dekho us kī mizha nīm-bāz karne ko

na so.e niiñd bhar is tañgnā meñ tā na muue

ki aah jā na thī pā ke darāz karne ko

jo be-dimāġhī yahī hai to ban chukī apnī

dimāġh chāhiye har ik se saaz karne ko

vo garm naaz ho to ḳhalq par tarahhum kar

pukāre aap ajal ehtirāz karne ko

jo aañsū aaveñ to pī jā ki tā rahe parda

balā hai chashm-e-tar ifshā-e-rāz karne ko

samand naaz se tere bahut hai 'arsa tañg

tanik to tark kar is tark taaz karne ko

basān-e-zar hai mirā jism-e-zār saarā zard

asar tamām hai dil ke gudāz karne ko

hanūz laḌke ho tum qadr merī kyā jaano

shu'ūr chāhiye hai imtiyāz karne ko

agarche gul bhī numūd us ke rang kartā hai

va-lek chāhiye hai muñh bhī naaz karne ko

ziyāda had se thī tābūt-e-'mīr' par kasrat

huā na vaqt musā.id namāz karne ko

jo main na hun to karo tark naz karne ko

koi to chahiye ji bhi niyaz karne ko

na dekho ghuncha-e-nargis ki or khulte mein

jo dekho us ki mizha nim-baz karne ko

na soe nind bhar is tangna mein ta na mue

ki aah ja na thi pa ke daraaz karne ko

jo be-dimaghi yahi hai to ban chuki apni

dimagh chahiye har ek se saz karne ko

wo garm naz ho to KHalq par tarahhum kar

pukare aap ajal ehtiraaz karne ko

jo aansu aawen to pi ja ki ta rahe parda

bala hai chashm-e-tar ifsha-e-raaz karne ko

samand naz se tere bahut hai 'arsa tang

tanik to tark kar is tark taz karne ko

basan-e-zar hai mera jism-e-zar sara zard

asar tamam hai dil ke gudaz karne ko

hanuz laDke ho tum qadr meri kya jaano

shu'ur chahiye hai imtiyaz karne ko

agarche gul bhi numud us ke rang karta hai

wa-lek chahiye hai munh bhi naz karne ko

ziyaada had se thi tabut-e-'mir' par kasrat

hua na waqt musaid namaz karne ko