dil pe KHun hai yahan tujhko guman hai shisha

dil pe ḳhuuñ hai yahāñ tujh ko gumāñ hai shīsha

shaiḳh kyuuñ mast huā hai tū kahāñ hai shīsha

shīsha-bāzī to tanik dekhne aa āñkhoñ kī

har palak par mire ashkoñ se ravāñ hai shīsha

rū-safedī hai naqāb-e-ruḳh-e-shor-e-mastī

rīsh-e-qāzī ke sabab pamba-dahāñ hai shīsha

manzil-e-mastī ko pahuñche hai unheñ se 'ālam

nisha-e-mai-balad o sañg-e-nishāñ hai shīsha

darmiyāñ halqa-e-mastāñ ke shab us kī jā thī

daur-e-sāġhar meñ magar pīr-e-muġhāñ hai shīsha

jā ke pūchhā jo maiñ ye kār-gah-e-mīnā meñ

dil kī sūrat kā bhī ai shīsha-garāñ hai shīsha

kahne laage ki kidhar phirtā hai bahkā ai mast

har tarah kā jo tū dekhe hai ki yaañ hai shīsha

dil hī saare the pe ik vaqt meñ jo kar ke gudāz

shakl shīshe kī banā.e haiñ kahāñ hai shīsha

jhuk gayā dekh ke maiñ 'mīr' use majlis meñ

chashm-e-bad-dūr tarahdār javāñ hai shīsha

dil pe KHun hai yahan tujh ko guman hai shisha

shaiKH kyun mast hua hai tu kahan hai shisha

shisha-bazi to tanik dekhne aa aankhon ki

har palak par mere ashkon se rawan hai shisha

ru-safedi hai naqab-e-ruKH-e-shor-e-masti

rish-e-qazi ke sabab pamba-dahan hai shisha

manzil-e-masti ko pahunche hai unhen se 'alam

nisha-e-mai-balad o sang-e-nishan hai shisha

darmiyan halqa-e-mastan ke shab us ki ja thi

daur-e-saghar mein magar pir-e-mughan hai shisha

ja ke puchha jo main ye kar-gah-e-mina mein

dil ki surat ka bhi ai shisha-garan hai shisha

kahne lage ki kidhar phirta hai bahka ai mast

har tarah ka jo tu dekhe hai ki yan hai shisha

dil hi sare the pe ek waqt mein jo kar ke gudaz

shakl shishe ki banae hain kahan hai shisha

jhuk gaya dekh ke main 'mir' use majlis mein

chashm-e-bad-dur tarahdar jawan hai shisha