kal mir ne kya kya ki mai ke liye betabi

kal 'mīr' ne kyā kyā kī mai ke liye betābī

āḳhir ko giro rakhā sajjāda-e-mehrābī

jaagā hai kahīñ vo bhī shab murtakib-e-mai ho

ye baat sujhātī hai un āñkhoñ kī be-ḳhvābī

kyā shahr meñ gunjā.ish mujh be-sar-o-pā ko ho

ab baḌh ga.e haiñ mere asbāb-e-kam-asbābī

din-rāt mirī chhātī jaltī hai mohabbat meñ

kyā aur na thī jaagā ye aag jo yaañ daabī

so malak phirā lekin paa.ī na vafā ik jā

jī khā ga.ī hai merā is jins kī nāyābī

ḳhuuñ basta na kyuuñ palkeñ har lahza rahīñ merī

jaate nahīñ āñkhoñ se lab-e-yār ke unnābī

jañgal hī hare tanhā rone se nahīñ mere

kohoñ kī kamar tak bhī jā pahuñchī hai sairābī

the māh-vishāñ kal jo un koThoñ pe jalve meñ

hai ḳhaak se aaj un kī har sahn meñ mahtābī

kal 'mīr' jo yaañ aayā taur is kā bahut bhāyā

vo ḳhushk-labī tis par jaama gale meñ aabī

kal 'mir' ne kya kya ki mai ke liye betabi

aaKHir ko giro rakha sajjada-e-mehrabi

jaga hai kahin wo bhi shab murtakib-e-mai ho

ye baat sujhati hai un aankhon ki be-KHwabi

kya shahr mein gunjaish mujh be-sar-o-pa ko ho

ab baDh gae hain mere asbab-e-kam-asbabi

din-raat meri chhati jalti hai mohabbat mein

kya aur na thi jaga ye aag jo yan dabi

so malak phira lekin pai na wafa ek ja

ji kha gai hai mera is jins ki nayabi

KHun basta na kyun palken har lahza rahin meri

jate nahin aankhon se lab-e-yar ke unnabi

jangal hi hare tanha rone se nahin mere

kohon ki kamar tak bhi ja pahunchi hai sairabi

the mah-wishan kal jo un koThon pe jalwe mein

hai KHak se aaj un ki har sahn mein mahtabi

kal 'mir' jo yan aaya taur is ka bahut bhaya

wo KHushk-labi tis par jama gale mein aabi