fikr hai mah ke jo shahr-badar karne ki

fikr hai maah ke jo shahr-badar karne kī

hai sazā tujh pe ye gustāḳh nazar karne kī

kah hadīs aane kī us ke jo kiyā shādī marg

nāma-bar kyā chalī thī ham ko ḳhabar karne kī

kyā jalī jaatī hai ḳhūbī hī meñ apnī ai sham.a

kah patañge ke bhī kuchh shām-o-sahar karne kī

ab ke barsāt hī ke zimme thā aalam kā vabāl

maiñ to khaa.ī thī qasam chashm ke tar karne kī

phuul kuchh lete na nikle the dil-e-sad-pāra

tarz sīkhī hai mire TukḌe jigar karne kī

un dinoñ nikle hai āġhushta ba-ḳhūñ rātoñ ko

dhun hai naale ko kaso dil meñ asar karne kī

ishq meñ tere guzartī nahīñ bin sar paTke

sūrat ik ye rahī hai umr basar karne kī

kārvānī hai jahāñ umr aziiz apnī 'mīr'

rah hai darpesh sadā us ko safar karne kī

fikr hai mah ke jo shahr-badar karne ki

hai saza tujh pe ye gustaKH nazar karne ki

kah hadis aane ki us ke jo kiya shadi marg

nama-bar kya chali thi hum ko KHabar karne ki

kya jali jati hai KHubi hi mein apni ai shama

kah patange ke bhi kuchh sham-o-sahar karne ki

ab ke barsat hi ke zimme tha aalam ka wabaal

main to khai thi qasam chashm ke tar karne ki

phul kuchh lete na nikle the dil-e-sad-para

tarz sikhi hai mere TukDe jigar karne ki

un dinon nikle hai aaghushta ba-KHun raaton ko

dhun hai nale ko kaso dil mein asar karne ki

ishq mein tere guzarti nahin bin sar paTke

surat ek ye rahi hai umr basar karne ki

karwani hai jahan umr aziz apni 'mir'

rah hai darpesh sada us ko safar karne ki