ab zoaf se Dhahta hai betabi shitabi ki

ab zo.af se Dhahtā hai betābī shitābī kī

us dil ke taḌapne ne kyā ḳhāna-ḳharābī kī

un daras-gahoñ meñ vo aayā na nazar ham ko

kyā naqal karūñ ḳhūbī us chehra kitābī kī

bhunte haiñ dil ik jānib sakte haiñ jigar yaksū

hai majlis-e-mushtāqāñ dukān kabābī kī

talḳh us lab-e-mai-gūñ se sab sunte haiñ kis ḳhātir

tah-dār nahīñ hotī guftār sharābī kī

yak bū kushī bulbul hai maujib-e-sad-mastī

pur-zor hai kyā daarū ġhunche kī gulābī kī

ab soz-e-mohabbat se saare jo phaphole haiñ

hai shakl mire dil kī sab shīsha habābī kī

nash-murda mire muñh se yaañ harf nahīñ niklā

jo baat ki maiñ ne kī so 'mīr' hisābī kī

ab zoaf se Dhahta hai betabi shitabi ki

us dil ke taDapne ne kya KHana-KHarabi ki

un daras-gahon mein wo aaya na nazar hum ko

kya naqal karun KHubi us chehra kitabi ki

bhunte hain dil ek jaanib sakte hain jigar yaksu

hai majlis-e-mushtaqan dukan kababi ki

talKH us lab-e-mai-gun se sab sunte hain kis KHatir

tah-dar nahin hoti guftar sharabi ki

yak bu kushi bulbul hai maujib-e-sad-masti

pur-zor hai kya daru ghunche ki gulabi ki

ab soz-e-mohabbat se sare jo phaphole hain

hai shakl mere dil ki sab shisha hababi ki

nash-murda mere munh se yan harf nahin nikla

jo baat ki main ne ki so 'mir' hisabi ki