garm hain shor se tujh husn ke bazar kai

garm haiñ shor se tujh husn ke bāzār ka.ī

rashk se jalte haiñ yūsuf ke ḳharīdār ka.ī

kab talak daaġh dikhāvegī asīrī mujh ko

mar ga.e saath ke mere to giraftār ka.ī

ve hī chālākiyāñ hāthoñ kī haiñ jo avval thiiñ

ab garebāñ meñ mire rah ga.e haiñ taar ka.ī

ḳhauf-e-tanhā.ī nahīñ kar tū jahāñ se to safar

har jagah rāh-e-adam meñ mileñge yaar ka.ī

iztirāb-o-qilq-o-zo.af meñ kis taur jiyūñ

jaan vāhid hai mirī aur haiñ āzār ka.ī

kyuuñ na huuñ ḳhasta bhalā maiñ ki sitam ke tere

tiir haiñ paar ka.ī vaar haiñ sofār ka.ī

apne kūche meñ nikaliyo to sambhāle dāman

yādgār-e-mizha-e-'mīr' haiñ vaañ ḳhaar ka.ī

garm hain shor se tujh husn ke bazar kai

rashk se jalte hain yusuf ke KHaridar kai

kab talak dagh dikhawegi asiri mujh ko

mar gae sath ke mere to giraftar kai

we hi chaalakiyan hathon ki hain jo awwal thin

ab gareban mein mere rah gae hain tar kai

KHauf-e-tanhai nahin kar tu jahan se to safar

har jagah rah-e-adam mein milenge yar kai

iztirab-o-qilq-o-zoaf mein kis taur jiyun

jaan wahid hai meri aur hain aazar kai

kyun na hun KHasta bhala main ki sitam ke tere

tir hain par kai war hain sofar kai

apne kuche mein nikaliyo to sambhaale daman

yaadgar-e-mizha-e-'mir' hain wan KHar kai