baghair dil ki ye qimat hai sare aalam ki

baġhair dil ki ye qīmat hai saare aalam kī

kaso se kaam nahīñ rakhtī jins aadam kī

koī ho mahram shoḳhī tirā to meñ pūchhūñ

ki bazm-e-aish jahāñ kyā samajh ke barham kī

hameñ to baaġh kī taklīf se muaaf rakho

ki sair-o-gasht nahīñ rasm ahl-e-mātam kī

tanik to lutf se kuchh kah ki jāñ-ba-lab huuñ maiñ

rahī hai baat mirī jaan ab koī dam kī

guzarne ko to kāj-o-vākaj apnī guzre hai

jafā jo un ne bahut kī to kuchh vafā kam kī

ghire haiñ dard-o-alam meñ firāq ke aise

ki sub.h-e-īd bhī yaañ shaam hai mahram kī

qafas meñ 'mīr' nahīñ josh daaġh siine par

havas nikālī hai ham ne bhī gul ke mausam kī

baghair dil ki ye qimat hai sare aalam ki

kaso se kaam nahin rakhti jins aadam ki

koi ho mahram shoKHi tera to mein puchhun

ki bazm-e-aish jahan kya samajh ke barham ki

hamein to bagh ki taklif se muaf rakho

ki sair-o-gasht nahin rasm ahl-e-matam ki

tanik to lutf se kuchh kah ki jaan-ba-lab hun main

rahi hai baat meri jaan ab koi dam ki

guzarne ko to kaj-o-wakaj apni guzre hai

jafa jo un ne bahut ki to kuchh wafa kam ki

ghire hain dard-o-alam mein firaq ke aise

ki subh-e-id bhi yan sham hai mahram ki

qafas mein 'mir' nahin josh dagh sine par

hawas nikali hai hum ne bhi gul ke mausam ki