ishq mein ne KHauf-o-KHatar chahiye

ishq meñ ne ḳhauf-o-ḳhatar chāhiye

jaan ke dene ko jigar chāhiye

qābil-e-āġhosh sitam dīdgāñ

ashk sā pākīza guhar chāhiye

haal ye pahuñchā hai ki ab zo'f se

uThte palak ek pahar chāhiye

kam hai shanāsā-e-zar-e-dāġh-e-dil

us ke parakhne ko nazar chāhiye

saiñkaḌoñ marte haiñ sadā phir bhī yaañ

vāqi'a ik shām-o-sahar chāhiye

ishq ke āsār haiñ ai bul-havas

daaġh ba-dil-e-dast basar chāhiye

shart salīqa hai har ik amar meñ

'aib bhī karne ko hunar chāhiye

jaise jaras paara gulo kyā karūñ

nāla-o-afġhāñ meñ asar chāhiye

ḳhauf qayāmat kā yahī hai ki 'mīr'

ham ko jiyā bār-e-digar chāhiye

ishq mein ne KHauf-o-KHatar chahiye

jaan ke dene ko jigar chahiye

qabil-e-aghosh sitam didgan

ashk sa pakiza guhar chahiye

haal ye pahuncha hai ki ab zo'f se

uThte palak ek pahar chahiye

kam hai shanasa-e-zar-e-dagh-e-dil

us ke parakhne ko nazar chahiye

sainkaDon marte hain sada phir bhi yan

waqi'a ek sham-o-sahar chahiye

ishq ke aasar hain ai bul-hawas

dagh ba-dil-e-dast basar chahiye

shart saliqa hai har ek amar mein

'aib bhi karne ko hunar chahiye

jaise jaras para gulo kya karun

nala-o-afghan mein asar chahiye

KHauf qayamat ka yahi hai ki 'mir'

hum ko jiya bar-e-digar chahiye