ghair ne hum ko zabh kiya nai taqat hai nai yara hai

ġhair ne ham ko zab.h kiyā nai tāqat hai nai yaarā hai

is kutte ne kar ke dilerī said-e-haram ko maarā hai

baaġh ko tujh bin apne bhā.eñ ātish dī hai bahārāñ ne

har ġhuncha aḳhgar hai ham ko har gul ek añgārā hai

jab tujh bin lagtā hai taḌapne jaa.e hai niklā hāthoñ se

hai jo girah siine meñ us ko dil kahiye yā paara hai

rāh-e-hadīs jo Tak bhī nikle kaun sikhā.e ham ko phir

rū-e-suḳhan par kis ko de vo shoḳh baḌā ayyāra hai

kaam us kā hai ḳhūñ-afshānī har-dam terī furqat meñ

chashm ko merī aa kar dekh ab lohū kā favvāra hai

baal khule vo shab ko shāyad bistar naaz pe sotā thā

aa.ī nasīm-e-sub.h jo idhar phailā ambar saarā hai

kis din dāman khīñch ke un ne yaar se apnā kaam liyā

muddat guzrī dekhte ham ko 'mīr' bhī ik nākāra hai

ghair ne hum ko zabh kiya nai taqat hai nai yara hai

is kutte ne kar ke dileri said-e-haram ko mara hai

bagh ko tujh bin apne bhaen aatish di hai bahaaran ne

har ghuncha aKHgar hai hum ko har gul ek angara hai

jab tujh bin lagta hai taDapne jae hai nikla hathon se

hai jo girah sine mein us ko dil kahiye ya para hai

rah-e-hadis jo Tak bhi nikle kaun sikhae hum ko phir

ru-e-suKHan par kis ko de wo shoKH baDa ayyara hai

kaam us ka hai KHun-afshani har-dam teri furqat mein

chashm ko meri aa kar dekh ab lohu ka fawwara hai

baal khule wo shab ko shayad bistar naz pe sota tha

aai nasim-e-subh jo idhar phaila ambar sara hai

kis din daman khinch ke un ne yar se apna kaam liya

muddat guzri dekhte hum ko 'mir' bhi ek nakara hai