tang aae hain dil us ji se uTha baiThenge

tañg aa.e haiñ dil us jī se uThā baiTheñge

bhūkoñ marte haiñ kuchh ab yaar bhī khā baiTheñge

ab ke bigḌegī agar un se to is shahr se jā

kaso vīrāne meñ takiya hī banā baiTheñge

ma.arka garm to Tak hone do ḳhūñ-rezī kā

pahle talvār ke nīche hamīñ jā baiTheñge

hogā aisā bhī koī roz ki majlis se kabhū

ham to ek-ādh ghaḌī uTh ke judā baiTheñge

jā na iz.hār-e-mohabbat pe havasnākoñ kī

vaqt ke vaqt ye sab muñh ko chhupā baiTheñge

dekheñ vo ġhairat-e-ḳhurshīd kahāñ jaatā hai

ab sar-e-rāh dam-e-sub.h se aa baiTheñge

bhiiḌ Taltī hī nahīñ aage se us zālim ke

gardaneñ yaar kisī roz kaTā baiTheñge

kab talak galiyoñ meñ saudā.ī se phirte rahiye

dil ko us zulf-e-musalsal se lagā baiTheñge

sho.ala-afshāñ agar aisī hī rahī aah to 'mīr'

ghar ko ham apne kaso raat jalā baiTheñge

tang aae hain dil us ji se uTha baiThenge

bhukon marte hain kuchh ab yar bhi kha baiThenge

ab ke bigDegi agar un se to is shahr se ja

kaso virane mein takiya hi bana baiThenge

marka garm to Tak hone do KHun-rezi ka

pahle talwar ke niche hamin ja baiThenge

hoga aisa bhi koi roz ki majlis se kabhu

hum to ek-adh ghaDi uTh ke juda baiThenge

ja na izhaar-e-mohabbat pe hawasnakon ki

waqt ke waqt ye sab munh ko chhupa baiThenge

dekhen wo ghairat-e-KHurshid kahan jata hai

ab sar-e-rah dam-e-subh se aa baiThenge

bhiD Talti hi nahin aage se us zalim ke

gardanen yar kisi roz kaTa baiThenge

kab talak galiyon mein saudai se phirte rahiye

dil ko us zulf-e-musalsal se laga baiThenge

shoala-afshan agar aisi hi rahi aah to 'mir'

ghar ko hum apne kaso raat jala baiThenge