piri mein kya jawani ke mausam ko roiye

piirī meñ kyā javānī ke mausam ko roiye

ab sub.h hone aa.ī hai ik dam to soiye

ruḳhsār us ke haa.e re jab dekhte haiñ ham

aatā hai jī meñ āñkhoñ ko un meñ gaḌoiye

iḳhlās dil se chāhiye sajda namāz meñ

be-fā.eda hai varna jo yuuñ vaqt khoiye

kis taur āñsuoñ meñ nahāte haiñ ġham-kashāñ

is āb-e-garm meñ to na uñglī Duboiye

matlab ko to pahuñchte nahīñ andhe ke se taur

ham mārte phire haiñ u nahīñ Tappe Toiye

ab jaan jism-e-ḳhākī se tañg aa ga.ī bahut

kab tak is ek Tokarī miTTī ko Dhoiye

ālūda us galī kī jo huuñ ḳhaak se to 'mīr'

āb-e-hayāt se bhī na ve paañv dhoiye

piri mein kya jawani ke mausam ko roiye

ab subh hone aai hai ek dam to soiye

ruKHsar us ke hae re jab dekhte hain hum

aata hai ji mein aankhon ko un mein gaDoiye

iKHlas dil se chahiye sajda namaz mein

be-faeda hai warna jo yun waqt khoiye

kis taur aansuon mein nahate hain gham-kashan

is aab-e-garm mein to na ungli Duboiye

matlab ko to pahunchte nahin andhe ke se taur

hum marte phire hain u nahin Tappe Toiye

ab jaan jism-e-KHaki se tang aa gai bahut

kab tak is ek Tokari miTTi ko Dhoiye

aaluda us gali ki jo hun KHak se to 'mir'

aab-e-hayat se bhi na we panw dhoiye