phir us se tarah kuchh jo dawe ki si Dali hai

phir us se tarah kuchh jo da.ave kī sī Daalī hai

kyā taaza koī gul ne ab shāḳh nikālī hai

sach pūchho to kab haigā us kā sā dahan ġhuncha

taskīñ ke liye ham ne ik baat banā lī hai

dehī ko na kuchh pūchho ik bharat kā hai gaḌvā

tarkīb se kyā kahiye sāñche meñ kī Dhālī hai

ham qadd-ḳhamīda se āġhosh hue saare

par fā.eda tujh se to āġhosh vo ḳhālī hai

izzat kī koī sūrat dikhlā.ī nahīñ detī

chup rahiye to chashmak hai kuchh kahiye to gaalī hai

do-gām ke chalne meñ pāmāl huā aalam

kuchh saarī ḳhudā.ī se vo chaal nirālī hai

haigī to do saala par hai duḳhtar-e-raz aafat

kyā pīr-e-muġhāñ ne bhī ik chhokrī paalī hai

ḳhūñ-rezī meñ ham soñ kī jo ḳhaak barābar haiñ

kab sar to faro laayā himmat tirī aalī hai

jab sar chaḌhe hoñ aise tab ishq kareñ so bhī

juuñ tuuñ ye balā sar se farhād ne Taalī hai

in muġhbachoñ meñ zāhid phir sar zada mat aanā

mindīl tirī ab ke ham ne to bachā lī hai

kyā 'mīr' tū rotā hai pāmālī-e-dil hī ko

un louñDoñ ne to dillī sab sar pe uThā lī hai

phir us se tarah kuchh jo dawe ki si Dali hai

kya taza koi gul ne ab shaKH nikali hai

sach puchho to kab haiga us ka sa dahan ghuncha

taskin ke liye hum ne ek baat bana li hai

dehi ko na kuchh puchho ek bharat ka hai gaDwa

tarkib se kya kahiye sanche mein ki Dhaali hai

hum qadd-KHamida se aaghosh hue sare

par faeda tujh se to aaghosh wo KHali hai

izzat ki koi surat dikhlai nahin deti

chup rahiye to chashmak hai kuchh kahiye to gali hai

do-gam ke chalne mein pamal hua aalam

kuchh sari KHudai se wo chaal nirali hai

haigi to do sala par hai duKHtar-e-raz aafat

kya pir-e-mughan ne bhi ek chhokri pali hai

KHun-rezi mein hum son ki jo KHak barabar hain

kab sar to faro laya himmat teri aali hai

jab sar chaDhe hon aise tab ishq karen so bhi

jun tun ye bala sar se farhad ne Tali hai

in mughbachon mein zahid phir sar zada mat aana

mindil teri ab ke hum ne to bacha li hai

kya 'mir' tu rota hai pamali-e-dil hi ko

un lounDon ne to dilli sab sar pe uTha li hai