naz-e-chaman wahi hai bulbul se go KHizan hai

nāz-e-chaman vahī hai bulbul se go ḳhizāñ hai

Tahnī jo zard bhī hai so shāḳh-e-za.afarāñ hai

gar is chaman meñ vo bhī ik hī lab-o-dahāñ hai

lekin suḳhan kā tujh se ġhunche ko muñh kahāñ hai

hañgām-e-jalva us ke mushkil hai Thahre rahnā

chitvan hai dil kī āfat-e-chashmak balā-e-jāñ hai

patthar se toḌne ke qābil hai aarsī tū

par kyā kareñ ki pyāre muñh terā darmiyāñ hai

bāġh-o-bahār hai vo maiñ kisht-e-za.afrāñ huuñ

jo lutf ik idhar hai to yaañ bhī ik samāñ hai

har-chand zabt kariye chhuptā hai ishq koī

guzre hai dil pe jo kuchh chehre hī se ayaañ hai

is fan meñ koī be-tah kyā ho mirā muāriz

avval to maiñ sanad huuñ phir ye mirī zabāñ hai

aalam meñ āb-o-gil kā Thahrāv kis tarah ho

gar ḳhaak hai aḌe hai var aab hai ravāñ hai

charchā rahegā us kā tā-hashr mai-kashāñ meñ

ḳhūñ-rezī kī hamārī rañgīn dāstāñ hai

az-ḳhvesh rafta us bin rahtā hai 'mīr' aksar

rahte ho baat kis se vo aap meñ kahāñ hai

naz-e-chaman wahi hai bulbul se go KHizan hai

Tahni jo zard bhi hai so shaKH-e-zafaran hai

gar is chaman mein wo bhi ek hi lab-o-dahan hai

lekin suKHan ka tujh se ghunche ko munh kahan hai

hangam-e-jalwa us ke mushkil hai Thahre rahna

chitwan hai dil ki aafat-e-chashmak bala-e-jaan hai

patthar se toDne ke qabil hai aarsi tu

par kya karen ki pyare munh tera darmiyan hai

bagh-o-bahaar hai wo main kisht-e-zafran hun

jo lutf ek idhar hai to yan bhi ek saman hai

har-chand zabt kariye chhupta hai ishq koi

guzre hai dil pe jo kuchh chehre hi se ayan hai

is fan mein koi be-tah kya ho mera muariz

awwal to main sanad hun phir ye meri zaban hai

aalam mein aab-o-gil ka Thahraw kis tarah ho

gar KHak hai aDe hai war aab hai rawan hai

charcha rahega us ka ta-hashr mai-kashan mein

KHun-rezi ki hamari rangin dastan hai

az-KHwesh rafta us bin rahta hai 'mir' aksar

rahte ho baat kis se wo aap mein kahan hai